DIGOS CITY -- Usa ka outlet sa Small Town Lottery (STL) ang gitulis sa mga armadong lalaki nga de-motorsiklo sa kanto sa dalang Badiang-Sinawilan, alas 7:40 sa gabii, Lunes, Mayo 21.

Daling nangayo og responde sa kapulisan ang attendant sa STL nga si Pearl Eliza Mae Abalayan, 22, dalaga nga molupyo sa Barangay Bato, silingang lungsod sa Sta. Cruz, Davao del Sur.

Gibutyag ni Police Officer 3 Bimbo Labajo, imbestigador sa kapulisan, nga kalit mibutho ang wa mailhing suspek ug way daghang rason nga nanion og .38 kalibre nga armas ngadto sa biktima.

Sa kahadlok sa biktima, dali niining gihatag ang iyang salaping koleksiyon nga mobalor og P2,500 ug duha ka Zen Fone cellphone nga mokabat sa P6,000.

Naatlan sab atol sa tulis, ang inahan sa biktima nga si Elizabeth, 46, kawani sa Mers Kitchenette, hinungdan nga nadamay ug nadagit ang iyang My Phone cellphone nga kantidad og P2,500.

Human sa insidente, paspas nga misakay sa naghuwat nga Honda XRM, kolor itom, ang suspek ug mikagiw padung sa wa matinong direksiyon.

Padayon pang mihimo og imbestigasyon ang kapulisan sa nahitabo sanglit di lang kini ang unang insidente nga dunay gitulis nga STL sa probinsiya. (Orlando B. Dinoy)