SA PAGTUMAW ug pagbalik sa Emerging and Re-emerging Infectious Diseases (Ereid), ang task force dinhi subling buhion sa Department of Health (DOH)-Davao human sa misteryusong viral pneumonia outbreak sa China.

Walay gidudahan nga indibiduwal, kinsa niabot dinhi sa siyudad, nga gitahong natakdan sa wala masayri pang sakit.

Si DOH Assistant Secretary Abdullah Dumama Jr. nagsulti ngadto sa mga tigbalita niadtong Martes, Enero 7, 2020, nga naistorya niya si Dr. Wilson Lim sa Bureau of Quarantine (BOQ) sa DOH-Davao kon diin ang naulahi nagkanayon nga si Dr. Josephine Villafuerte, Davao City Health Office (CHO) head, ug laing ahensiya nihangyo sa BOQ alang sa usa ka miting alang sa posibleng pagbalik sa task force.

"If you can remember, meron tayong tinatawag na Task Force Ereid. Diba, meron yong Ebola noon, Sars (severe acute respiratory syndrome), at Mers-CoV (Middle East respiratory syndrome-related coronavirus) so i-reactivate 'yon [task force] para sa prevention," tug-an ni Dumama.

Ang misteryusong sakit nga respiratory nga dunay wa masayring "etiology" nga nakatakod na og daghang mga atwo kinsa nibiyahe sa South China Seafood City food market sa Wuhan City, Hubei Province sa China, nakahatud og kahadlok sa publiko.

Hinungdan nga ang mga awtoridad sa panglawas nagtaas sa ilang pagbantay aron nga mapakgang ang pagsulod sa maong sakit dinhi ning panahona.

"As of the moment, wala tayong kaso or reported cases of this mysterious viral pneumonia that is happening in China now," matud ni Dumama. (Juliet C. Revita)