PADAYON ang gihimong military operation batok sa mga sakop sa grupo sa teroristang Dawlah Islamiyah Hassan Group nga naglihok sa Maguindanao del Sur uban ang Bangsamoro Islamic Freedom Fighters (BIFF).

Niadtong Huwebes, gilusad ang focused military operation sa Joint Task Force Central sa mga nahisgutang grupo kon diin tulo ang napatay samtang duha ang naangol gikan sa terorista.

Mga napatay giila nga sila si Samsudin Miro, Kamid Sindatu ug Mohaimen Salik samtang ang naangol mao sila alyas Anding ug alyas Mantato, mga sakop ni Kumander Almoden Sibud sa Dawhal Islamiyah.

Gibutyag ni 6th Infantry (Kampilan) Division Chief ug Joint Task Force Central Commander Major General Alex Rillera nga gibombahan sa JTF Central ang kampo sa mga terorista gamit ang 155 Howitzers Cannon sa utlanan sa Pagalungan ug Datu Montawal sa maong probinsiya ug M'lang, Pikit ug Tulunan, Cotabato Province duol sa Liguasan Delta.

Tungod niini, daghang mga sibilyan sa lugar ang nanghikling paingon sa luwas nga dapit sa kahadlok nga maangin sa kagubot.

Samtang mga terorista daling miikyas padulong sa hilit nga dapit Maguindanao del Sur ug probinsiya sa Cotabato.

Sa pagsuwat ning balita, padayon pang gigukod sa JTF Central ang mga terorista sa maong mga probinsiya.