SA PAKIGKOMBATI batok sa tigpameke, nagplano ang Siyudad sa Davao nga silotan ang nagpakatap niining malisyusong impormasyon.

Gisulti ni Konsehal Bonz Andrei Militar, tsirman sa Committee for information technology, sa paghinabi kaniya uban sa Davao City Disaster Radio niadtong Oktubre 13, 2022, nga mga tigpakatap og fake news sa di madugay masilotan na.

"So puwede na nato sila gukuron after ani mapasa nato ni siya nga proposal," bahad ni Militar.

Matud ni Militar nga ang paghimo sa balaod sa sim card makataban gkanila nga matumbok ang mga masinupakon.

"Puwede man gud nato makuha ang ilahang number, kung naggamit sila og data, if ever fake account sila kung unsa tong data ilang gamit puwede nato makuha ang number," pasalig ni Militar.

Dugang pa niya, nga bisan sa tiggamit og wifi di maluwas.

"If wifi pud siya or router pud puwede gihapon nato makuha [data] sa ISP (internet service provider) nila kung asa to nga balay or location," dugang ni Militar.

Gibutyag ni Militar nga kini usa lang ka precautionary measure aron nga malikayan ang paghasol sa publiko.

"Dako man gud siya og effect sa public, especially kung makahatag siya og kahadlok sa mga taga Davao. Kabalo ta ang taga Davao is nasanay na sa very peaceful na city, life is here gyud ta," pagtin-aw niya.

Giklaro niya nga duna gyuy mga indibiduwal kinsa gusto lang gyud mosamok sa katawhan tungod sa kalinaw sa siyudad.

"Pero naa gyud laing mga tawo gusto manira sa Davao City, gusto maghatag og samok para at least karon mahadlok na pud sila magbuhat og ing-ani because dali na nato sila magukod," dugang pasalig ni Militar.

Hinuon ila pang gihingpit ang edad nga mahimong silotan apil na ang mga atubangon niini nga kaso.