MGA tindahan nga manglabada dinhi sa siyudad sa Davao mahimo na karong mangabri, basta motuman gihapon sa mga "health safety measures."

Gisulti ni Davao City Mayor Sara Duterte-Carpio sa paghinabi kaniya sa radyo, Mayo 5, nga iya nang gitugtan ang mga tindahang manglabada nga mobalik na sa ilang operasyon human ang lokal nga kagamhanan nisagop sa Omnibus Guidelines on the Implementation of Community Quarantine nga giisyu sa Inter-Agency Task Force for the Management of Emerging Infectious Diseases (IATF-EID), pinaagi sa Executive Order 28-A niadtong Lunes.

Matud sa mayor nga ubos sa IATF-EID guidelines, mga tindahang manglabada nalangkob ubos sa mga establisemento nga gitugtan na nga mopadayon sa ilang operasyon.

"If there is a conflict between the executive ordinance diria sa Davao, and the IAFT guidelines, ang masunod is ang IATF guidelines," pagklaro sa mayor sa interbyu niini sa 87.5 FM Davao City Disaster Radio.

Apan pahimangno niya nga mga nahisgutang tindahan kinahanglan nga mosubay gihapon sa "health safety measures" sama sa pagsul-ob og personal protective equipment (PPE).

Iya sab nga gipahimangnoan ang maong mga tindahan nga di isagol mga sinina sa ilang mga kustomer sa usa ka bukag.

"Because wala ta kabalo kinsa ang infected," tin-aw sa mayor.

Apil sa gisagop nga sumbanan nga nagtugot sa operasyon uban sa skeleton workforce sa laundry shops; mga pribadong establisemento nga nalambigit sa probisyon sa batakang pagkaon ug serbisyo, ug mga aktibidad nga dunay kalambigitan sa produksiyon sa pagkaon ug tambal.

Ang tindahang manglabada kanhi wala tugoti sa Davao City sukad nga gipatuman ang ECQ niadtong Abril 4.

Ang mga sumbanan sa IATF nagtugot sab sa operasyon sa ubang pang mga butang sama sa sinina, accessories, hardware, housewares, school, ug mga office supplies apan "delivery" lang. (Ralph Lawrence G. Llemit/CIO)