KIDAPAWAN CITY -- Tibuok sakop sa Sangguniang Panlungsod sa Magpet, North Cotabato pulos gipang-quarantine human nga na-contact trace sa ilang bise mayor nga nakaduol og nagpositibo sa Covid-19.

Nasayran nga ang bise mayor unta ang molingkod isip acting mayor sa lungsod apan wala madayon gumikan sa nahitabo.

Kini maoy hinungdan nga ang mohulip isip acting mayor mao na ang Municipal Local Government Operation officer (MLGOO) nga si Ivy Cervantes sugod kagahapon, Lunes, Hunyo 14, 2021.

Nasayran nga dunay close contact si Vice Mayor Rogelio Marañon nga usa ka coronavirus-positive nga indibiduwal ug iyang nakauban ang tanang mga konsehal sa lungsod.

Gitakda unta nga si Marañon maoy molingkod isip acting mayor sa Magpet human nga upat na ka adlaw nga wala magpakita si Mayor Florenito Gonzaga sa dihang magkasakit ug na-admit sa usa ka balay tambalanan sa Kidapawan City.

Giingong mao kini ang pinakauna nga higayon sa probinsiya nga molingkod isip acting mayor ang MLGOO.

Sa kasamtangan, nagpadayon ang contact tracing sa Municipal Health Office sa mga nakauban sa mga opisyal sa SB sa lungsod.