NAKONSENSYA hinungdan nga mi-surrender sa kapitan sa Barangay Gabuyan, Kapalong, Davao del Norte ang 22 anyos kinsa maoy inahan sa bag-ong himugso nga bata nga nakit-ang patay na nga naglutaw sa Sampao River, Martes, Oktubre 27.

Sa taho gikan sa Police Regional Office-Davao, mitahan sa kaugalingon ang inahan gumikan giingong nakonsensya kini.

Alas 6 sa gabii niadtong Oktubre 27 mitahan ang inahan nga nagsige og hilak diin suma niini ginagukod siya sa konsensya sa iyang nahimo.

Nasayran nga nag-inusara ang maong inahan sa balay sa iyang bayaw nga babaye nga daplin sa Sampao River, diin niadtong higayona, manganakay na kini.

Dihang nagbati na kining inahan, paggawas sa bata iya kining gibutang daplin sa sapa ug gibiyaan.

Nasayran nga midako ang tubig sa sapa gikan sa bukid, hinungdan nga naanod ang bata ug nalumos.

Nakatakdang kasohan ang maong inahan kinsa anaa karon sa pagkustodiya sa Women and Children's Protection Desk sa Kapalong Municipal Police Station.