DAVAO DEL SUR -- Nadismaya ang ubang niapil sa liboan ka mga naglinya atubangan sa dakong mall sa dakbayan sa Digos kay wa maapil sa “pay-out” sa Rigen Marketing, adlaw’ng Martes.

Ang uban nagagikan pa sa silingang probinsiya sa North Cotabato kinsa apil nibubo og puhonan tungod sa gitanyag nga 400 porsiyento tubo sa kapital niini.

Giasoy ni Elena Montibon, 49, taga Makilala nga alas 6 pa lang sa buntag niabot na siya sa dakbayan sa Digos sa paglaum nga makuha na ang iyang pay-out.

Bisan si Leonor Margate, 43, taga Kidapawan City, naglaum nga mokita na ang iyang P10,000 nga gibubo sa kompaniya.

Nadismaya sab ang ubang taga Davao del Sur, human nakasinati og susamang suliran.

Nagdasok ang bagang duot sa katawhan sud sa mall sa siyudad niadtong higayona human gihimo sa kompaniya ang grand launching.

Subay sa gipahibawo sa kompaniya sa ilang social media account, usa ka advance pay-out ang ilang gihimo diin pagabunuton pinaagi sa sistema sa computer ang makaapil niini isip promotional offer lamang atol sa pormal nga pagsugod sa negusyo.

Adunay gitakdang pay-out alang sa mga miyembro ang kompaniya karong mosunod nga mga adlaw mao nga giabisohan ang mga miyembro nga huwaton lamang ang dugang pahibawo.