NAHIMONG away sa bag-ong magtiayon human wala magpahalok ang asawa gumikan kay nahadlok nga mataptan sa gikalisangang 2019 novel coronavirus acute respiratory disease (2019-nCoV ARD).

Sa saysay sa igsuong si Marife, 18, nasayran nga ang maguwang niya nga si Lanie, 25, nga usa ka tuig pa lang nakasal sa bana nga si Armando, 27, dako ang gibating kahadlok sa pagkuyanap sa 2019-nCoV.

Matud pa nga misamot ang kahadlok sa iyang maguwang sa dihang wa nay mapalit nga face mask sa mga botika. Ug sa dihang nikatap ang sayop nga balita nga adunay nataptan sa maong sakit sa siyudad sa Tagum kon tua nagtrabaho ang iyang bana, mas nabalaka pa siya og maayo.

Alas 6:00 sa gabii niadtong Sabado, Pebrero 1, 2020, miuli sa Nabunturan, Davao de Oro si Armando human sa usa ka semana nga pagtrabaho sa nahisgutang siyudad ug bag-ong nakadawat og suweldo ug nakainom sa iyang pag-uli.

Matud pa nga malipayon ang bana nga miabot sa balay ug dayong duol sa asawa kay gustong mohalok kay naandan na niyang gihimo.

Apan kalit lang nibalibad ang asawa niadtong higayona ug giingnan ang bana nga "kaligo usa ug mangarkuhol."

Grabe ang kasuko nga gibati sa bana ug niulbo ang panaglalis tali sa asawa kon diin niabot sa punto nga giakusahan na sa lalaki ang babaye nga dunay laing bathala kay nabag-o na kini.

Misamot ang away sa duruha dihang gipangbuak ni Armando ang mga plato ug baso sa kusina samtang nanghipos sa mga sinina ang asawa ug mibiya sa balay, kauban ang manghod nga si Marife, kinsa nabalaka nga di na maka-eskuwela.

Sa pagsuwat ning balita, ang magsuon atua sa balay sa ilang ginikanan sa Cateel, Davao Oriental ug sumala pa naghuwat ang maguwang nga sunduon sa iyang bana.

"Ana man na sila kung mag-away dayong layas-layas si Ate. Unya si Kuya dayon pod apas-apas aron suyuon akong maguwang. Ang akong pagtungha ang madamay kay maka-absent na pod ko tungod sa ilang away," kabalaka ni Marife.