KIDAPAWAN CITY -- Gipakusog sa militar ug kapulisan sa Rehiyon 12 ang ilang pagbantay, ilabina sa mga dapit nga gipailawom sa election hotspot areas.

Apil sa unom ka lungsod nga anaa sa hotspot area mao ang Maitum ug Kiamba sa Sarangani Province nga dunay presensya sa New People’s Army (NPA) lakip na ang Banga sa South Cotabato.

Sa probinsiya sa Sultan Kudarat mao ang mga lungsod sa President Quirino ug Palimbang nga dunay mga armadong NPA, BIFF lakip na mga lokal nga terorista.

Gibantayan sab ang Pikit sa North Cotabato nga dunay presensya sa BIFF, mga terorista ug uban pa nga mga armadong grupo.

Gitumbok ang unom ka lungsod nga election hotspot area sa COMELEC base sa pagtuon sa kapulisan ug militar.

Nagpabilin nga kontrolado sa otoridad ang unom ka lungsod sa rehiyon 12 ug wala pay natala nga election-related-violence sugod sa election period.

Walay ikahadlok ang mga botante gumikan sa hugtanon nga seguridad nga gipatuman sa militar ug kapulisan sa Rehiyon 12, karong adlawa. (Edgar Fuerzas)