BANSALAN, Davao del Sur -- Gidagsa na sa mga lokal nga turista gikan sa mga silingang probinsiya ang dam sa National Irrigation Administration (NIA) sa Bansalan nga maoy usa sa mga tourist destination karong summer.

Si Leah Alforque, 23, nalingaw kauban ang iyang pamilya nga gikan pa sa lungsod sa Makilala, North Cotabato.

Tungod kay libre ang pagkaligo sa dam daghan ang misuway, ilabi na ang pagpadidit sa 20-piye nga water slide.

Usa si John Pinggoy, nga taga Sta. Cruz, Davao del Sur, nga misuway pagpadidit ug alang niya lingaw kaayo ang kasinatian.

Di pa dugay, gipailawom sa “state of calamity” ang probinsiya tungod sa naglagiting kainit nga hatud sa El Niño.

Gumikan niini, daghan ang mangaligo sa NIA dam tungod sa kabugnaw sa tubig nga gipalibutan sa mga kakahoyan ug nindot nga talan-awon.

Ang tinubdan sa tubig gikan sa tiilan sa Mt. Apo maoy nakahatag og kabugnaw sa palibot.

Adunay pundong tunga sa milyong litro ang dam mao nga di kini mahubsan.

Daghan sab ang nagalaba sa ubos nga bahin sa sapa ilabi na ang mga apektado sa way tarong nga serbisyo sa Bansalan Water District (BWD).

Dinhi sab nagagikan ang patubig sa mga basakan sa patag sanglit gitukod ang dam alang sa mga mag-uuma.

Apan, nagpasidaan ang lokal nga gobyerno nga di mokompiyansa ilabi na ang mahilig motindog sa pagpadidit tungod kay dangog ang slide nga adunay daghang lumot nga hayan mabagok ang ulo kon mawad-an og balanse.

Gibutyag sab sa Bansalan Municipal Police Station nga magbutang sila og mga personahe human gilauman nga modagsa ang katawhan sa lugar karong Semana Santa. (Orlando B. Dinoy)