SI DEFENDING champion Johnny Arcilla sa Butuan City, kasamtangang naka-rank sa men's no. 2 sa Unified Tennis Rankings December 31, 2018, mibalewala sa pagdepensa sa titulo, samtang si no. 4 John Bryan Otico sa Bukidnon mikumpirma sa iyang pagsalmot sa Third Mayor James Gamao Invitational Tennis Tournament, Abril 24 ngadto 27 sa Panabo City.

Kahinumduman nga si Arcilla, bisan og na-injured ang abaga, mipildi ni Otico sa tulo ka sets atol sa men's finals sa nakalabay nga tuig.

"Basta Merco tournament excited talaga ako," ni Arcilla sa Facebook interview kaniya sa SunStar Davao.

Apan gidugang niya nga sa pagkakaron wala kaayo siya gaduwa.

Ang Mindoro Open 2019 karong Abril 12 ngadto 21 ang magsilbing una niyang torneyo karon nga tuig.

Kini sab ang nag-inusara niyang tune-up event una ang Panabo netfest nga gipresenta sa Merco ug Selecta.

Si Merco president Anton Ferrazzini, chairman of tournament organizer For The Love of Tennis (Flot) Group, nagsulti nga si Otico bag-uhay lang mikumpirma nga moapil.

"The eight men and eight women slots are complete," matud niya.

Mokumpleto sa mga lalaking magduduwa mao ang Dabawenyos nga sila John Jeric Accion ug Mark Anthony Alcoseba, Leander Lazaro, Noel Damian, Jr. ug John Mari Altiche samtang ang Patrimonio sisters, Anna Clarice ug Anna Christine, manguna sa women's event uban sila Marian Jade Capadocia, Allysa Mae Bornia, Khim Iglupas, Shaira Hope Rivera, Mary Aubrey Calma ug Danna Abad.