MIREKLAMO ug nagpatabang ngadto sa mga tigbalita sa dakbayan sa Davao, ang badminton team gikan sa dakbayan sa Iloilo human sila alegasyong gidid-an sa National Screening Committee sa Palarong Pambansa 2019 nga makadula.

Atol sa usa ka hamubo nga press conference sa usa ka hotel sa Davao City kagahapon, gisaysay ni Eunice Gaan, guardian sa mga bata, nga dili makatarunganon ang desisyon sa screening committee mahitungod sa gikwestiyon nga residency sa unom ka mga players sa badminton nga anaa sa iyang poder.

Admitado ang grupo ni Gaan nga dunay reklamo may kalabutan sa residency sa iyang mga players apan naresulba na kuno kini sa regional screening committee sa Western Visayas Region diin natingala na lamang sila nga lahi ang desisyon sa screening committee sa national.

“Wala man lang due process, ni hindi kami pinatawag... lumabas lang bigla ang desisyon na hindi makapaglaro ang mga bata namin,” ingon ni Gaan atubangan sa mga tigbalita.

Ang Iloilo team maoy midaug batok sa team gikan Negros atol sa ilang regional meet.

Ang protesta gikan mismo sa usa ka badminton team sa lugar sa Negros Occidental nga sakop gihapon sa Western Visayas Region kon diin gikwestiyon ang residency sa mga magdudula sa badminton team gikan sa Iloilo City.

Gipasabot ni Gaan nga duna siya’y barangay certification nga nagpamatuod nga ang mga bata nga anaa sa iyang poder sukad pa kaniadtong 2017 ug nagpuyo uban kaniya sa Brgy. Ortiz, siyudad sa Iloilo.

“They have to hear our side, itigil muna ang laro,” apila ni Gaan.

Nasubo sila gumikan anaa na sila sa Davao City ug wala nila masinati ang kahigayonan nga makadula luyo sa ilang pagdahom nga makadula sila.

Plano karon sa grupo nga mopasaka og temporary restraining order aron mapungan nga makadula ang team sa Bacolod City nga maoy nihulip sa ilang team.