NASUNGKIT sa taga dakbayan sa Davao nga si Sydney Sy Tancontian ang iyang ikatulong bronse sa world tournament sa bag-ohay lang natapos nga 2019 Chungju World Martial Arts Masterships sa Chungju, South Korea.

Ang unang bronse nasakmit atol sa iyang debut sa World Sambo Championships 2018 nga nahitabo sa Bucharest, Romania niadtong Nobyembre 12 ug gisundan kini niya og laing bronse sa 2019 Sambo World Cup Kharlapiev Memorial Competition sa Moscow, Russia niadtong Marso.

Si Tancontian, 19, niyukbo ngadto kang Mongolia’s Sainbuyan Bataa, 1-3, sa ilang women 65+ kilograms semi-finals. Kini human niya giluhod si Maduri Perera sa Sri Lanka.

Si Bataan nidaug sa bulawan pinaagi sa 4-0 shutout win batok kang Ridha Ridwan sa Indonesia sa ilang kampeyonatong tigi.

“I’m happy pero I still need to improve on how I play my game po. Kasi may mga errors po akong mga nagawa,” sulti ni Tancontian sa Sun.Star Davao sa paghinabi sa Facebook.

Sa iyang Facebook post, gisulti niya, “Thank you to everyone who supported me! Will do better in the next competitions to come.”

Ang Dabawenya ug ang iyang manghod nga lalaki nga si Chino apil sa nag-unang magduduwa sa nasud sa sambo event sa Pilipinas sa 2019 Southeast Asian (SEA) Games gitakda sa Nobyembre 30 hangtud Disyembre 11.

Niangkon sab sila Pinoy Renzo Cazenas ug Helen Aclopen og plata ug bronse, sa maong han-ay.

Si Cazenas nilukmay ngadto kang Cheng-wei Lai sa Chinese Taipei sa ilang men’s 90+ gold medal match samtang si Aclopen nakigtigi sa women’s 52 kilograms division.