ANG Dabawenyang si Samantha Umayan nagsunod sa amahan niyang si Vincent, nga gaduwa sab og chess.

Suma pa 10-anyos na siya nakat-on sa maong isports, di sama sa uban nga sayo, sa edad pa nga 4-5 anyos.

Apan wa kini igsapayan ni Sam, 13.

“Tinuruan po ako ng Papa ko at nahiligan ko na rin po,” niya sa pakighinabi sa SunStar Davao.

Uwahi siyang mitigi sa Davao City Athletic Association (Dcaa) Meet, duha ka tuig ang milabay.

Nakahuman si Sam sa Buhangin Central Elementary School Sped Center (BCESSC) diin gidawat niya ang scholarship nga gitanyag sa FEU kaniya.

Rason niya sa pagpili sa FEU, “dahil po sa scholarship at dahil po sa training na meron sa FEU, lalo na po GM (grand master) ang nagtuturo”.

Bag-ohay lang niya nahuman ang 75th Philippine National Chess Championships NCR Elimination Leg sa Pasay City diin mga iladong magduduwa ang misalmot.

Gipildi niya si 67th seed John Miguel Legaspina, 52nd seed Amando Labarda ug 41st seed Roma Asea Simplina.

Dayon, split points tali 38th seed Anne Krischa Tagayuna ug 50th seed Raymond Parra sa torneyo.

Apan, napildi siya sa 13th seed Robert Cacho ug Donato Bello Jr.

Miabante siya sa semifinals nga naka-iskedyul karong Nobyembre.

Si Sam miangkon sab og runner-up honors sa 2019 National Chess Championships semi-final round sa Malvar, Batangas.

Mitabang sab siya sa Team Philippines nga makadaug og tulo ka silver medals sa 29th Asean+ Age-Group Chess Championships 2019, Hunyo, Mandalay, Myanmar.

Siya sab gold medalist sa girls under-14 event sa 2019 National Age-Group Chess Championships Visayas Leg nga gihimo sa SM Seaside Cebu ug under-13 girls champion sa 2019 National Youth and Schools Chess Championship-Visayas Leg sa Bacolod City.

Si Sam, nga consistent honor student, mipupo sab og silver medal sa 2019 National Age-Group Chess Championships.