GIPAKYAS sa Diagold Pawnshop ang Sarabia Bowlers kinsa dunay twice-to-beat advantage human mikampeyon sa Sunday Bowlers Club (SBC) Mixed Oktoberfest Bowling Tournament niadtong Martes gabii, Oktubre 23, sa Fairlanes Bowling Center.

Ang upat ka tim nanguna human sa unom ka eliminasyon mao ang Sarabia Bowlers, Diagold, JJ Dat ug Homer diin ang naa sa unang puwesto maoy nakakuha sa twice-to-beat ug sila nagkontra sa up-the-ladder-finals.

Napildi sa Homer ang JJ Dat sa iskor 520-501 apan pakyas ang Homer sa Diagold, 538-534 ug sila nag-atbang sa Sarabia diin gilampaso nila kini sa duha ka duwa, 511-488, ug 544-520 aron mauli ang premyong P10,000.

Mga pambato sa Diagold mao sila Fritz Gerald Barros, Merci Delmar, Lhanz ZoiePearl Bravo Dmc, Eddie Sagario ug Nonoy Baluyot.

Nakuha sab sa Sarabia Bowlers ang P7,000 nga gidulaan nila

Jun Auza, Dra. Mona Luz Sarabia, Ching Mangubat, Cocoy Villarin ug Bong Villamor.

Sila Muktan Amsirabi, Sky Amsirabi, Mathess Domino, Nadz Ajijil ug Nash Amsirabi nga pambato sa Homer nga dunay premyong P5,000.

Ang nabutang sa ikaupat puwesto mao ang JJ DAT tim nga niuli og P3,000 nga gidulaan nila Tata Gorgonio, Agnes Rafamonte, Maam Jee, Jojo Sta. Maria ug Dencio Manit.

Ang kompetisyon gisuportahan sa lokal nga panggobyerno sa Davao isip kabahin sa promosyon ug pagpalambo sa isports sa duckpin bowling sa dakbayan.