GIINGONG mas kusog ang hugon-hugon nga si kanhi two-division world champion Danny Garcia ang suma pa nag-unang anaa sa listahan sa mosunod nga makaharong sa Pinoy ring icon nga si Sen. Manny Pacquiao.

Apan suma kang MP Promotions president Sean Gibbons, gikinahanglan una nga dominahon ni Garcia ang away niya tali Ivan Redkach sa Ukraine karong Enero 25 aron maselyuhan ang kasabutan.

“Redkach is a tough guy who comes to fight but Danny should win,” ni Gibbons.

Luyo kang Garcia, gipilian sab sa Team Pacquiao ang retirado nang si Floyd Mayweather Jr. nga suma pa posible nga mobalik og away karon nga tuig.

Alang ni head coach Buboy Fernandez kung siya ang pangutan-on, way problema kung kinsa man ang makaharong sa senador.

Apan sa kabahin ni Coach Freddie Roach mas bug-at ang iyang dughan kang Garcia isip sunod nga kasukmagay ni Pacquiao.

Niya, kumpiyansa siyang mapildi ra kini sa senador.

Nauna ng gisulti sa kampo sa boxing-senator nga human sa Bag-ong Tuig tukion na nila kinsa ang sunod nga kaatbang ni Pacman.

Nanganti si Pacman nga depensahan ang iyang WBA super welterweight title sa bulan sa Abril.