ANG kasamtangang lider sa liga nga Talk N’ Text (TNT) Katropa makigbugno batok sa Magnolia Hotshots Pambansang Manok alas 5 sa hapon sa Nobyembre 16, sa Universitiy of Southeastern Philippines (Usep) Gym.

Kini ang gibutyag ni organizer Arkiquest chairman Hector Magno atol sa Davao Sportswriters Association (DSA) Forum didto sa The Annex of SM City Davao Huwebes, Oktubre 10.

Matud niya, “We are bringing the two teams that we first brought here in 2014 when the game went into triple overtime. It’s a new boost for basketball fans in Davao after what happened to the Philippines in Fiba, downhearted ta gamay.”

Sa niaging tuig, matud niya, mga duwa sa Philippine Basketball Association (PBA) gihimo sa Digos City o Panabo City. “It’s about time na mag-host ulit tayo ng PBA game dito sa Davao,” dugang pa niya.

Ang triple overtime niadto, sumala pa niya, nihatag kanila og problema kay kinahanglan silang mobayad og dugang usa ka oras nga abang sa Usep Gym.

Apan sumala ni Magno, naghinam-hinam sila nga nalingaw ang mga Dabawenyos pinaagi sa duha ka mga inilang tim sa PBA sa nasud.

Si Logistics head Rameses Tancontian, sa iyang bahin, nagsulti nga nakig-alayon sila sa ABS-CBN aron nga madeterminar ang benepisyaryo sa maong duwa.

Sa niaging panahon, matud niya nagtukod sila og classrooms sa mga indigent nga mga tinun-an sa Barangay Salumay sa Marilog District ug nag-isponsor og indigent sab nga tinun-an kinsa buot nga mokuha og Architecture. Pila kanila nigraduwar na ug nipasar na og board exam.

Si Security committee head Alfredo Suarez nagsulti, “The game will be very competitive and will be a good opportunity for Dabawenyos to witness it again.”

Sukad alas 3 sa hapon kagahapon, ang TNT Katropa duna nay lima ka daug ug wala pay pildi samtang ang Magnolia Hotshots nitali og 3 daug, usa pildi.

Samtang si Neil Pagcaliwagan nagsulti nga mga tiket nagkantidad og P1,500 (courtside), P1,200 (ringside) ug P600 (general admission).

Mga tiket mapalit sa Iconarts GSIS, Iconarts Gaisano Mall of Davao, Helen’s Pawnshop Victoria Plaza, KMS Lighting, Harbour Roadside Kitchen and Solid Ground Construction.

Apil sa mga bisita atol sa tigum mao sila Maryl Piastro ug May Yap.

Ang Arkiquest mao ang mga asosasyon sa mga arkitekto sa siyudad sa Davao. (Marianne L. Saberon-Abalayan)