NASUNGKIT sa Iligan City ang unang bulawang medalya sa "poomsae" samtang ang kyorugi jins sa Davao City miabante sa tigi sa Batang Pinoy 2019 Mindanao leg taekwondo nga nagsugod sa Gaisano Mall sa dakbayan Lunes, Pebrero 4.

Si Kairos William Almonia nirehistro og 7.685 puntos aron nga pildihon ang mga kauban nga si Liam Reilley Rubio (7.620) ug Cabanglasan's Rey Angelo Macapundag (7.550) kinsa mitapos og plata ug bronse sa maong han-ay.

Ang bag-ong sampa sa Batang Pinoy nga si Almonia, 12, nagsulti nga wala siya maglaum nga makadaug og bulawan. "I'm happy. This is my first time at kinabahan talaga ako," tug-an niya ug dugang nagkanayon nga ang iyang gihunahuna lang nga nag-inusara lang siyang nagpasundayag sa iyang rutina.

Butyag niya nga ang "poomsae" mas lisud itandi sa kyorugi tungod kay ang nahiuna kinahanglan nga iperpek ang porma human sa paghimo niini og balik-balik.

Apan gibalewala ni Almonia ang ilang tsansa sa team poomsae event.

Samtang ang mga jins sa Davao City nga sila si John Louis Zaballero ug Kurt Sebastian Velchez niabante sa ilang tagsa-tagsa ka kyorugi divisions.

Si Zaballero mipakamang kang Kieth Enzo Avila sa Malita, Davao Occidental, 16-0, sa cadet boys bantamweight division samtang gilukmay ni Velchez si Zack Kevin Aguelo sa Kiamba, Sarangani Province, 3-0, sa cadet boys featherweight event.