ANG kanhi University of Mindanao runner Sonny Wagdos sa Philippine Air Force maoy mihari sa Hunat Dabaw 6: Glow Run niadtong Dominggo sa gabii, Septiyembre 9, sa The Royal Mandaya Hotel.

Midomina siya sa men's 10-kilometer division nga mioras og 35 minutos ug 50 segundos samtang Dante Baay (36:20) ug Arlan Arbois (37:00) ang misunod sa duha ka puwesto.

Matud ni Wagdos nga wa siyay plano moapil tungod gusto niya makauban sa pagbakasyon ang pamilya.

“Serve as tune up lang to kay nakabakasyon lang man god ko then na timing lang jud naay race,” sulti sa Airman 2nd Class (A2C).

Sa pagdagan usab sa Davao City, usa ka espesyal alang kaniya.

“Lami kaayo sa feeling kay life is here in Davao City gyud, Happy kaayo kay na miss nako ug taman ang pag dagan sa mga kalsada sa Davao.”

Samtang Vivian Avergonzado, ang gikoronahan sa women's 10K kontra nila Daymie Rose Jaro ug Carah Marie Cortez.

Bahin ni Elmer Bartolo maoy midaug sa men's 5K category batok George Andrade ug Jimbo Lugay samtang Andrea Annabela Duqia ang nanguna sa women's 5K class kontra Diana Memoracion ug Sharmain Yonson.

Sa 3k, si Fritz Clarence Lataco mihari samtang daug si Angelica Villanueva sa babaye.

Midagan sab si Esdevco president ug chief executive officer Glenn Escandor, tag-iya sa The Royal Mandaya Hotel, uban ang 3,200 midagan diin kini ang pinakadaghan miapil sa Hunat Dabaw. (ABM)