ANG Montaña Pawnshop maoy mikampeyon sa unang Mindanao Banana Farmers and Exporters Association (MBFEA) Basketball League nga gihimo sa Rizal Memorial Colleges (RMC) Petro Gazz Arena.

Gipildi nila ang Mafs Customs Brokerage, 89-82, sa championship match taliwala sa mala-bayaning kamada sa most valuable player (MVP) Nel Molina nga mitigum og 20 puntos, 18 ka rebounds, lima ka assists ug upat ka blocks.

Ang Mafs nanguna, 40-38, sa halftime ug napabilin ang momentum hangtud sa third period.

Apan ang Montaña nga gigiyahan ni Flordelito Cagampang nanimawos ug gilabni ang kadaugan.

Si Montaña’s Jon Refuerzo ug Darell Manliguez midugang og 19 ug 17 puntos.

Si Refuerzo mihimo og lima ka rebounds, pito ka assists ug tulo ka steals samtang si Manliguez mikamada og lima ka assists.

Samtang ang Mafs, nga misalig kang Redlyn Arellano ug Jon Lomugda nagkumboya sa 27 puntos.

Ang kampeyon nga tim midawat og P50,000 samtang ang runner-up may P10,000 sa Samahang Basketbol ng Pilipinas (SBP)-sanctioned nga kompetisyon nga giorganisa sa Basketball Avenue’s Aldin Celi.

Gilusad ang torneyo aron makatigum og pundo alang sa mga lumad schools.