MATI CITY, Davao Oriental -- Di lamang aron malingaw ka kun di ma-ehersisyo sab ang kalawasan ug nahimo na sab nga kabahin sa paugnat sa kusog, di lamang sa laing nasud apan mipatok na kini karon sa Pilipinas.

Gani, diha sa mga charity program, mga fund raising activities, ug bisan sa paglingaw lamang sa mga takna, ang pagbisikleta ang usa sa mga pamaagi nga ginahimo karon.

Sa padayong pagsaka sa kaso sa Covid-19 ug tungod sa mga protocol sa gobyerno, midaghan ang nagtoon sa pagbisikleta nga bisan asa ka moadto, dunay mga nag-bike, mapa-bata man o edaran.

Sa siyudad sa Mati, gipahimuslan sa City Sports Office (CSO) ang pagbisikleta nga maoy hinungdan nga natukod ang “Tour de Mati -- Theo Cup.”

“It’s a fun ride, it’s also a tribute to the late son of Vice Mayor Glenda and her husband Tyron, — si Theo, that’s why we named Theo Cup... and since we are in this pandemic we creating this cycling event so that people can come together,” sulti ni Paolo Rabat, head organizer sa maong programa sa pakighinabi sa Ang Mati Karon.

Nakipagkoordenar ang CSO sa Sangguniang Kabataan ug Local Youth Development Office aron masigurong mahimong malampuson ang katikaran.

Alang sa mga gusto muapil, nagsugod na ang registration niadtong Marso 22 hangtud Abril 30 sa CSO nga nahimutang sa Sports Complex.

Matud sa CSO, dunay guidelines ang pagrehistro mao ang musunod:

Alang sa natawo ug nagdako sa Mati, natawo ug nagdako sa Mati apan nagtrabaho sa gawas sa Mati, diin mamahimong magdala og birth certificate o voters ID.

Samtang alang sa mga wala natawo ug nagdako sa Mati apan nagtrabaho sa Mati sa unom ka bulan ug wala natawo ug wala nagdako sa Mati apan nagpuyo sa Mati sa unom ka bulan mamahimong magdala og barangay certificate o employment certificate.

Dunay duha ka category sa bike mao ang road bike ug mountain bike. Open kini sa mga batan-on, babae ug lalaki nga nag-edad 15-anyos pataas.

Muabot og 85 kilometros ang gilay-on sa rota nga magsugod sa FGR Baywalk Park, molibot sa Barangay Bobon ug Diversion Road pabalik sa FGR Baywalk Park.

Dugang sa organizer, mahitabo kining event karong umaabot nga Mayo 16, 2021 alas 4 sa kaadlawon diin naay naghulat nga cash prizes, medals, ug certificate nga madawat sa mga mosalmot.

“I would like to invite everyone from Mati City, to join the Tour de Mati - Theo Cup. Open to everyone from ages 15 onwards... it is a great way to come together and great pleasure to us to heal as one,” dugang ni Paolo Rabat.

Kanunay’ng hinumdoman nga ang pagbisikleta dili lamang makahatag og kalingawan sa katawhan, apan usa usab kini ka dakong tabang aron mas mahimsog ang panglawas ug malikay sa mga sakit labi na karong panahon sa pandemya. (Kauban si Jeepy P. Compio sa Superbalita Davao)