DAVAO DEL SUR -- Gidagsa sa bagang duot sa katawhan ang Philippine Basketball Association (PBA) All Star sud sa Davao del Sur Sports Coliseum niadtong Miyerkules sa gabii, Mayo 23.

Daghan ang nag-selfie sa mga iladong All Star players sama nila Terrence Romeo ug uban pang mga magduduwa nga gikan sa Mindanao ilabi na kang Scottie Thompson nga lumad sa siyudad sa Digos.

Apan mas nahugyaw ang sud sa coliseum human nakit-an ang presensiya nila Special Assistant to the President (SAP) Bong Go, Atty. Mans Carpio nga bana ni Davao City Mayor Sara Duterte ug General Santos City Rep. Bobby Pacquiao.

Nagpakitang gilas ang mga inilang personalidad pinaagi sa tagduha ka-team-up alang sa Legend Shootout.

Si Romeo ug Carpio maoy midaug sa puntos nga 33, human milabaw kini nilang Kenneth Duremdes ug Pacquiao nga mikuha lamang og 27 puntos.

Si Romeo, maoy nihulip kang PJ Simon nga unang gikataho nga maka-team ni Carpio, mikuha dayon og 24 puntos ug gidugangan og siyam ka puntos sa uwahi nga miresulta sa ilang kadaugan.

Nag-team up sab sila si Allan Caidic ug Bong Go nga mikuha lamang og 22 puntos.

Samtang si Scottie Thompson maoy ka-team ni Major Michael Sabsal sa Provincial Mobile Force Battalion nga adunay 18 puntos.

Sa pagpamulong ni SAP Bong Go gipadayag niini nga usa sa mga prayoridad ni Presidente Rodrigo Duterte ang pagsuporta sa mga sporting activities sama sa basketball.

Gidasig ni Go ang publiko ilabi na ang kabataan nga tutukan ang basketball ug likayan ang ilegal nga druga.

Samtang midaug ang Mindanao All Star sa puntos nga 144 batok 130 sa Gilas Pilipinas.

Sa kinatibuk-an, nahimong malinawon ug malampuson ang paduwa human gipakatag ang daghang puwersa sa kapulisan palibot sa coliseum.

Gikan Davao del Sur, magpadayon ang All Star week padung sa Batangas City sa Mayo 25. (Orlando B. Dinoy)