NAGGINAKSANAY ug naglukso-lukso ang mga magduduwa ug coaches sa Philippine Women's College (PWC) Patriots sa tumang kalipay human nadungog ang "buzzer" ug naangkon ang ilang pinakaunang medalyang bulawan sa Dacs Sportsfest 2019 college men's basketball.

Kini human nga gipakuratan sa Patriots ang Cor Jesu College (CJC) of Digos, 95-84, sa rubber match sa ilang best-of-three finals niadtong Dominggo, Oktubre 6, sa Holy Cross of Davao College (HCDC) Gym.

Nilamang ang CJC og dos puntos, 24-22, sa katapusan sa unang kuwarter apan ang PWC nagpahugot sa ilang depensa ug gilabwan ang lamang sa kontra, 48-39.

Si Patriots coach Joselito Celis, sa paghinabi sa teks uban sa Sun.Star Davao kagahapon, nagsulti, "Nag all the way mi og full court. Ginapa deny nako ilang pag-receive sa bola sa ilang shooters. History jud ni para sa school."

Si Joshua Cerbas nibuslo og 27 puntos ug kauban nga si si Josua Lacadon nidugang og 15 aron nga hakwaton ang Patriots ngadto sa kadaugan.

Ang ilang depensa, sumala niya, nidula og papel sa ilang Game 3 nga kadaugan, dugang nagsulti nga kanunay niyang gipahimangnoan ang iyang mga magduduwa nga di sila masipyat sa depensa.

"Offense wins games but defense wins championship, mao na akong ginabalik-balik sa ilaha," tin-aw niya. Gitumbok niini ang mga magduduwa sa CJC nga pisikal kaayo ug dunay gidak-on, ug kinahanglan nilang mokayud aron nga silhigon ang serye sa duha ka dula.

Kahinumdoman nga ang PWC unang nilamang sa duwa, 74-56, apan ang CJC nitabla sa serye human nakabawos sa 68-60 kadaugan sa ikaduhang duwa.

Gisulti sab niya nga "It's the fruit of our labor, tanan sacrifice namo pagmata og sayo, hard ang praktis daily nasuklian aning daug. Nakuha namo ang championship."