KUNG ang nagtiniil nga runner sa Bicol Region, Lheslie de Lima midepensa sa iyang secondary girls 3,000-meter title aron makuha ang iyang unang Palarong Pambansa 2019 gold medal Lunes, Abril 29, si Digos City thrower Khessie Jane Baluyot mihatag sab sa Davao Region sa unang medalya sa athletics competition nga gihimo sa University of Mindanao (UM) track oval, Siyudad sa Davao.

Si Baluyot, sa iyang bahin, mihakot sa bronze sa secondary girls discus throw event, nga gipangunahan ni Ainah Masangkay sa National Capital Region (NCR).

Ang 17-anyos nga si Baluyot, incoming Grade 12 student sa Kapatagan National High School, nga nahimutang sa tiilan sa Mt. Apo, mirehistro og 33.54 meters sa iyang ikalima nga attempt aron labwan ang kaugalingong 30.33m record sa Davao Region Athletic Association (Davraa) Meet 2019 niadtong Enero.

"Sa wala pa mag-start, ang akong goal ra is makaapil sa best eight pero unexpectedly nag third pako," suma sa Davraa double gold medalist, nga anaa na sa ikalima niyang pagsalmot sa Palaro.

Dugang pa niya, "Ang akong kahago nako nga giagian, gihuna-huna sad nako akong family, ang team ug ang region sa akong pagdula."