ANG Davao Association of Private Schools and Administrators, Incorporated (Daprisa) 2018 Games pormal nga tigian sa Septyembre 22 sa Precious International School of Davao (PISD).

Kini ang pahayag nila Daprisa president Mylene Rochelle Cruz ug vice president Michael Rogel Kwan atol sa Kapehan sa Dabaw sa The Annex of SM City Davao niadtong Lunes, Septyembre 17.

Ang Unit 8 Daprisa maoy mahimong kuwalipikado alang sa Davao City Athletic Association (Dcaa) 2018 Meet diin karong tuiga anaa sa 43 sa 60 miyembrong eskuwelahan ang magkontra.

Ang torneyo dunay 26 ka events lakip ang secondary ug elementary basketball, volleyball ug swimming diin mao kini ang kusog nga duwa sa ilang unit.

Matud ni Cruz ang Palarong Pambansa 2018 swimming champion ug kasamtangang record holder sa secondary girls 800-meter freestyle ug Davao Region Athletic Association (Davraa) elementary boys basketball champion team kay gikan sa Daprisa.

Dugang niya nga duna say himuong cheerdance competition sa seremonya nga 11 elementary tims ang mag-ilog sa bulawan medalya. (ABM)