DEAR Heartline,

Maayong adlaw sa tanang nagasubaybay ning imong ginasulat.

Magshare lang ko sa akong kaagi sa gugma. Ako diay si Lyn, 29-anyos, dalaga, apan buntis ko og tulo ka bulan karon.

Okay na unta ang tanan, pero wala ko nag-expect nga dakong minyo diay ning akong nauyab karon nga si Larry.

Siya mismo ang misulti nako siguro kay nakonsensiya na siya.

Pagkahibalo nako nahugno gyud ang akong kalibutan. Ang mga plano nako para sa among anak ug siya nawala gyud tungod sa kasakit.

Sulti niya, dili sila bulag sa iyang asawa, kana lang natintal lang gyud siya kay lagi usahay ra siya makauli sa ilaha kay biyahe-biyahe man siya.

Wa nako kasabot sa akong himuon Heartline, akong ginikanan suko kaayo nako, usahay makahuna-huna nako og hikog aron mahuman na tanan.

Help me Heartline.

Lyn

Hi Lyn,

May mga higayon gyud sa atong kinabuhi nga kita masayop sa pagdesisyon.

Pero inay nga magsige kag basol sa imong self, ug sa nahitabo, better pick up yourself and move forward.

Ilabi na sa kaso nimo karon nga buntis ka, angay nga mas hatagan nimo og higayon ang imong kaugalingon nga moginhawa ug ipalayo ang ka-negatibo.

Timan-i, wala kay sala. Dili sala nga nahigugma ka.

Angay nga tulisukon tong lalaki nga nagpaka-aron ingnon nga single.

Karon huna-hunaa ang long term nga pagdagan sa imong kahimtang. Kay dako man diay siyang minyo then do unsa ang sakto.

Siguradoha sab nga di maalanganin ang welfare sa inyong anak, pinaagi sa suporta nga iyang ihatag. Apan kung di siya bukas niini, then ayaw na ipamugos. Tungod kung tarong siya, di niya pasagdan ang iyang anak.

Labot sa kasuko sa imong ginikanan, normal kini ug dawata.

Way ginikanan nga naghandum nga mabutang sa ingon ana nga sitwasyon ang anak.

Sakit alang kanila ang makita kang nasakitan. As for me, bakod ug balik kanila.

Mawala man kanang amahan sa imong gisabak, ang pamilya nimo magpabilin sa imong kiliran.

May that mistake will serve as a lesson kanimo nga next time you'll be careful na.

Ayaw sab kalimot sa pag-ampo.

Heartline