KON hisgutan ang Barangay 23-C, Poblacion, Isla Verde sa Davao City, mosantop dayon sa hunahuna sa mga Dabawenyo ang taas nga kaso sa coronavirus disease (Covid-19).

Tungod niini, nabati gayod sa mga residente sa maong barangay ang tumang diskriminasyon; gani ang pila-pila nakahimo sa pagpamakak. Kon pangutan-on kon asa sila nagpuyo, di gyod moingon nga taga Barangay 23-C.

Gani, di na sab magpasulod ang pipila ka mga department stores kon makita ang Food and Medicine (FM) pass nga taga Barangay 23-C.

Giangkon ni Davao City Mayor Sara Duterte-Carpio nga naa gayo'y taas nga kaso ang maong barangay sa Covid-19.

"Very severe atong situation sa Brgy 23-C kay daghan tag positive Covid-19 cases didto. This (barangay) has been a subject of our meetings," ingon ni Mayor Sara atol sa regular nga radio interview niini sa 87.5 FM dcDR, Biyernes, Hunyo 3,.

Diskriminasyon ang naabot. Di gyud kini malikayan. Busa ang tanang residente sa dapit motuman gyud sa mga gipatuman nga balaud sa gobyerno aron di na motaas ang kaso.