HUMAN sa pipila ka mga adlaw nga nabalik ang operasyon sa Philippine Charity Sweepstakes Office (PCSO), daghan ang nangalipay, daghan sab ang nasubo kay wala pa mabalik ang operasyon sa Small Town Lottery (STL).

Ang nasubo kadtong mga trabahante niini nga gapa-eskuwela sa ilang mga anak ug maoy gisaligan nga kakuhaan og makaon sa matag adlaw.

Sa laktud, kulob kaayo ang kaldero sa mga trabahante niini, apan sa laing bahin sa kasubo, bisan wala pa nahibalik ang STL, dunay kalipayon.

Nganong makaingon og nalipay? Gumikan nanggawas na sab ang mga ushers nga maoy gikonsiderang mga ilegal nga nagpataya og 'last-two digits'.

Hinuon makakuwarta ang mga ushers, apan ang makaluluoy niini, ang gobyerno gumikan wala mabahinan sa ginansiya sa mga ilegal nga coordinators ug mga financiers niining last-two.

Maayo man kadtong sa STL motaya og last-two, kay mohatag man ang STL og bahin sa gobyerno nga mao sab ang ihatag sa gobyerno ngadto sa mga tawo nga mangayog tabang sama pananglit mga tambal ug ubang bills sa ospital.

Kini lang gud unta ang lantawon sa gobyerno nga kung magmagahi ang administrasyon ni Pangulong Rodrigo Duterte nga di gyud ibalik ang STL, nan di kini maoy sulosyon aron mawala ang giingong kurapsyon diha sa PCSO.

Basin tingali niini, dunay mga dagkong financiers nga dunay koneksyon ngadto sa mga iladong politiko nga maoy alegasyong misulsol sa pangulo.

Hinuon di man masulsolan ang pangulo kay naa man siya'y ligdong nga desisyon alang sa usa ka butang nga ikaayo sa tanan.

Nanguntana lang ang katawhan basin unya duna. Pangutana nga mamahimong tinuod, mamahimo sab nga dili.

Sa ato pa, dili tukmang solusyon ang padayon nga pagpasira sa operations sa STL, Keno ug Peryahan ng Bayan kay makamugna man hinuon kini og laing problema.

Ang subsub ug seryuso nga paggukod sa mga ilegalista ug mga korap nga mga opisyal sa PCSO nga wa kinahanglana nga hunongon ang operasyon sa mga nahisgutang sugal, maoy haom nga solusyon.