LAING ngilngig nga aksidente sa kadalanan ang nahitabo niadtong Lunes, Pebrero 4.

Ang aksidente naglambigit sa yunit sa Davao Metro Shuttle (DMS) ug Bachelor bus nga mikalas og lima ka kinabuhi sa pasahero nga giingong duha niini pulos mabdos, samtang laing 29 samaron.

Nahitabo ang disgrasya didto sa Nabunturan, Compostela Valley.

Kon sumadahon, di na seguro maihap ang nakalas ug naangol sa mga aksidente sa kadalanan dinhi sa Davao Region, di lang mga bus ang nalambigit, apil na mga depasaherong sakyanan ug mga motorsiklo.

Ang disgrasya sa kadalanan puwedeng mekanikal, sayop sa tawo o tungod sa kinaiyahan.

Ang mekanikal mahimong daut ang makina o mawad-an og brake ug uban pa. Sa “human error,” puwedeng nakainom ang drayber busa di na kondisyon ang iyang hunahuna o lihok sa iyang mga kamot o tiil o kaha nakatulog o wala makabantay hinungdan nga nadisgrasya.

Samtang, duna say higayon nga mahitabo ang disgrasya gumikan sa kinaiyahan sama pananglit sa kusog nga ulan o kaha pagbaha o dangog ang kadalanan.

Malikayan ang mga mekanikal nga depekto sa sakyanan kon kanunay nga susihon sa operator ug drayber ang ilang yunit.

Kay masayran na man daan kon unsay diperensiya sa sakyanan una sila mobiyahe.

Samtang ang human error malikayan sab kon di kaskasero ang drayber o kaha maayo ang kondisyon sa nagmaneho sa sakyanan nga wala makainom ug maayo ang tulog sa di pa siya modrayb.

Ug sa kinaiyahan mahimong malikayan ang disgrasya kon mag-inampingon ang drayber. Di puguso. Kon di makaya kay kusog ang ulan o kaha baha, mopundo una o kaha mopadaplin.

Wa magkuwang ang mga awtoridad niining mga pahimangno alang sa mga nagmaneho og sakyanan. Apan sama lang sa milampos sa pikas dunggan ang mga pahimangno kay kanunay man lang nga dunay mahitabong disgrasya.

Hinuon, duna nay gihimong lakang ang LTFRB sa nahitabong disgrasya niadtong Lunes. Angay lang gyud nga dunay manubag sa hitabo aron nga mahatagan og hustisya ang mga biktima.