DI GYUD lalim ang kahimtang sa mga kabataan nga nagtungha karon sa Marawi City.

Kini ang atong nakita sa taho sa mga opisyales sa Compostela Valley nga miapil sa paglusad og "Oplan Balik Eskwela 2018" niadtong Hunyo 8-10, 2018.

Suma sa team sa mga empleyado sa provincial engineering office nga gipangulohan ni Governor Jayvee Tyron Uy, midawat nga eskwelahan mao ang Pendolonan Elementary School sa Marawi City.

Sa maong tunghaan, mikomitar nga ayuhon ang duha ka lawak, kasilyas ug nidonar og Bestank nga pundohan og tubig.

Ang kalisud sa mga kabataan maoy mahulagway sa pahayag ni Faida P. Razul -- usa sa mga magtutudlo nga nahasol sa Marawi siege -- nga nipadayag sa iyang pasalamat sa mga volunteers.

Suma niya, sukad-sukad sa dihang nahuman ang giyera sa Marawi, nabati nila ang paghigugma gikan sa mga Pilipino tungod sa sinserong pagtabang kanila.

Gawas niya, si Manaoray Taratingan nagsulti nga usa sa ilang mga problema ang naguba nga lawak, water storage facility ug comfort rooms.

Giingon niya nga lisod kaayo nga mag-abli sa klase kung nangaguba na ilang pasilidad sa tunghaan unya walay saktong kapasilungan ang mga kabataan.

Atong gipasalamatan ang mga volunteers nga mitabang sa atong mga igsuon sa Marawi, apan mas labaw kita nga magpasalamat kung dunay konkreto nga plano ang gobyerno sa mga biktima sa giyera kapin tuig na ang milabay.