BISAN pa sa way kaluoy ug puas nga kampanya batok sa gidiling druga sa kagamhanan, pabilin gihapon kining dakong problema.

Niadtong Miyerkules, duha ka mga drug den didto sa siyudad sa Tagum ang natiktikan sa mga awtoridad ug gipangpuhag. Atol sa operasyon, duna say pipila ka mga naaresto nga personalidad sa dihang naabtan sulod sa maong mga lugar.

Di lang sa Tagum, nahitabo sab kini sa pipila ka mga lugar dinhi sa nasud. Kay pabilin gihapong suliran ang ilegal nga druga. Duna gihapoy daghan ang nangadakpan nga nalambigit niini. Samtang ang uban napatay sa mga awtoridad gumikan kay misukol.

Daghan sab gihapong mga higayon nga makasakmit ang mga awtoridad og dinaghan nga shabu ug mga kagamitan niini.

Gani, naghinobra na ang gihatag nga pagtagad ug panahon sa gobyerno aron lang pagpuhag sa sindikato sa druga, apan mora og wala man lang matarog.

Ingon na gyud diay niini kagrabe ang suliran sa gidiling druga sa nasud?

Mao tingali nga gikapoy na ang Presidente, Rodrigo Duterte, sa gipasiugdahan niyang kampanya gumikan kay wala man lay pagtuang ang pagpalusot niini.

Moabot na sa kapin kun kulang 4 mil ang napatay sa mga awtoridad sa kampanya, wala pay labot ang nangadakpan ug ang mga miampo sa mga awtoridad.

Sayang lang unya ang nasugdan nga paningkamot kon ang gobyerno mismo mohural sa pagsulbad niini.

Lala man o di ang problema sa druga, angay nga ipadayon sa gobyerno ang kampanya batok niini.

Kay kon di ipadayon sa gobyerno ang kampanya batok druga, unsa na lang kaha kon pasagdan na lang kining mokuyanap sa nasud? Mas mosamot kagrabe ang sitwasiyon ug magmata na lang unya kita og buntag nga napuno na kita og mga adik.