DAKO kaayo og tabang ang Lingap para sa Mahirap nga programa sa dakbayan alang sa mga Dabawenyo, ilabi na gayud sa kabus natong mga kaigsuonan.

Sa tanang panahon, ang Lingap maoy daling madangpan sa naggilaid nga katawhan sa dakbayan aron nga matabangan sa mga suliran gikan sa bayad sa ospital, medisina, pagpalubong sa mga mahal sa kinabuhi nga namatay ug uban pang mga panginahanglan nga di na makaya sa ilang bulsa.

Pila na kaha ka milyon ka mga tawo ang natabangan sa Lingap busa unsa na lang kon wala kini nga programa sa lokal nga kagamhanan?

Apan pahimangno lang sa atong mga kaigsuonan dinhi sa dakbayan nga kon kaniadto walay gipili ang pagtabang sa Lingap, karon duna nay mga limitasyon.

Ning bag-o milagda si Mayor Sara Duterte-Carpio og Executive Order No. 7 series of 2018 aron nga amendahan ang "coverage" sa Lingap para sa Mahirap aron pagseguro sa kaepektibo sa pagtunol og mga serbisyo niini ngadto sa mga kuwalipikado nga molupyo sa dakbayan.

Unod sa maong kamandoan, di na malakip sa tabang sa Lingap kadtong mga naangol sa mga motorsiklo, drayber man o pasahero, nga wala misunod sa lagda sa balaod trapiko sama sa pagsul-ob og saktong helmet.

Mga drayber nga nalambigit sa mga aksidente nga ilawom sa makahubog nga ilimnon ug ilegal nga druga.

Kadtong mga indibiduwal nga nangasamdan o naangol samtang naghimo og krimen.

Apil sab sa di na tabangan sa Lingap mao ang mga sakop sa New People's Army (NPA) ilabi na kadtong nangasamdan nga nakuha gikan sa pakig-engkuwentro sa mga tropa sa gobyerno.

Ug kadtong mga pasyente sa kasong maternity, nga dunay isyung medical nga naglambigit sa bag-ong natawo nga mga bata.

Kini maoy mga kabag-ohan karon sa pagtabang sa Lingap ngadto sa mga Dabawenyo nga angay natong masayran sa atong pagdangop unya ngadto sa kagamhanan para matabangan.