NIADTONG Biyernes, si Davao City Mayor Inday Sara Duterte ug ang Davao Light and Power Company (DLPC) miselyo og usa ka kasabutan alang sa proyektong Business for Environmentally Sustainable Transformation (BEST) Bus nga maoy labing bag-o nga makitang magdagan sa kadalanan sa siyudad.

Nasayran nga pito ka mga BEST buses, nga 100% nga electric ug fully-airconditioned ang nagdagan nga nagsugod, kagahapon, Disyembre 14.

Matag bus maka-akomodar og 30 ka tawo, apan tungod sa pandemya, 15 una ang iakomodar niini. Libre kini, way bayad sa pagsakay. Ang himuon, moparehistro sa BEST Pass QR Code ug i-scan kini una mosakay sa bus.

Ang mga rota sa bus: Downtown Ikot 1 (North Loop) moagi sa C. Bangoy St., ngadto Rizal St., Bolton St., Magallanes St., C.M. Recto, Acacia, Bajada, SM Lanang, Azuela Cove, R. Castillo, Carpenter, Sta. Ana Ave., balik sa C. Bangoy St.

Downtown Ikot 2 (South Loop) mosubay sa C. Bangoy St., ngadto Palma Gil St., Camus, Quirino, Bankerohan, Sandawa, Quimpo Blvd., Ecoland Drive, Times Beach, Ecowest, Quimpo, Sandawa, Bankerohan, Magallanes, Boulevard, R. Magsaysay ug balik sa C. Bangoy.

Usa ka maayong tilimad-on sa paglambo sa siyudad; nahitabo kini gumikan sa pagdayong pagsunod sa Dabawenyo sa mga obligasyon niini isip usa ka lungsuranon.

Magtinabangay kita nga mas molambo pa ang atong siyudad luyo sa pagbugno niining krisis sa pandemya.