KUMUSTA na mong tanan? Parehas na ba mo namo nga morag puga nga taas ang buhok ug bungot?

Hindi tayo nag-iisa tungod kay hangtod karon nga "general community quarantine" na, limitado gihapon ang pag-adto sa barbero, salon ug parlor, siyempre di kalimtan ang "physical distancing."

Sulayi daw magpagupit nga taas kaayo ang gunting nga morag gunting sa sagbot? Hasta ang pagsimba bawal pa. Dunay pari nga naggamit na la'g plastic nga pusil-pusil nga mosirit ang Holy Water sa iyang pagbunyag.

Sa pagkatinuod mas kuyaw karong panahona kaysa sa nangaging walo ka semana, tungod kay puwede nang molakaw sa gawas ang kadaghanan. Hasta ang sakyanan puwede na modagan basta limitado lang ang sakay busa tambag nako nga likay-likay una.

"Work from home," ug "stay alive at home" kaysa magsakit ka nga hasta ra bang mahala sa bayad. Di ka mamatay sa sakit kun di sa kadako sa imong bayrunon sa ospital.

Nanguli na ang mga overseas Filipino workers ug bisan negatibo sila, delikado gihapon kay naay pipila kanila ang gitawag og "asymptomatic." Sama sa nahitabo sa Gensan diin ingon ni Mayor Rivera nga ang 33-anyos nga niabot niadtong Mayo 27 gikan sa Kuwait kay positibo sa Covid-19 pandamay.

Na-swab siya sa Manila niadtong Mayo 12 apan niadtong Mayo 26 lang nigawas ang resulta sa iyang test diin anaa na siya sa airport. Paghiabot niya sa Gensan, siyempre gikurentinas dayon siya sa usa ka ospital hasta ang uban niyang mga kauban sa Elf nga ilang gisakyan gikan sa airport.

Apan niadtong Mayo 30 nagpaguwa ang City Health Office og advisory nga walay "confirmed cases" sa Covid-19 sa Gensan ug ang resulta daw sa usa ka suspetsado negatibo. Ang makalibog kay matud pa ang tanang OFWs nga anaa sa "facility" mga "asymptomatic."

Nahibulong ang akong higalang manunulat sa Gensan nga si Edwin Espejo sa maong Advisory nga sa iya pa istupido ang nagsulat niini. Sa ato pa namakak si Mayor Rivera sa pag-ingon nga positive ang babayeng OFW nga gikan sa Kuwait?

Matud pa ni Edwin nga ang pulong "asymptomatic" gigamit sa mga tawong positibo sa Covid-19 apan dili makita ang simtomas nga anaa kini kanila apan mananakod kini sila. Mao kini ang delikado kon dili magpa-test ang asymptomatic kay abi lang niya'g wala siyay sakit mao nga magsige siya'g suroy unya diay nakatakod na sa uban.

Sa akong tan-aw may mali ang advisory sa Gensan. Kadtong mga nasutang asymptomatic ihapon tong mga Covid-19-positive aron mahibal-an sa tanan ang tinuod nga kahimtang. Nindot lagi tan-awon nga zero positive kuno apan di diay tinuod.

Busa kamo diha sa Gensan, bantay-bantay mo sa mga OFWs nga wala nagkurintinas paghiabot sa inyong lugar kay basin asymptomatic ni sila. Maayo na lang nga mag-facemask ta ug maghugas sa kamot kanunay kaysa magsakit.

Kadto sab nga mga OFWs nga bag-o lang niabot, hulata usa ang tamang panahon nga puwede na mong mosuroy kauban sa inyong mga mahal sa kinabuhi. Ayaw pagpasaway kay basin ulahi na ang pagmahay.