DUHA na lang ka adlaw og matapos na ang unom ka tuig nga PRRD Administration. Ginaingon nga way permanenting kausaban niining kalibutana kon dili ang kausaban lamang.

Gani niadtong Hunyo 23, gipahigayon dinhi sa Davao ang simpleng salosalo isip pasalamat kang PRRD sa pagdumala sa nasud. Gitambongan kini sa mga dagkong opisyal nga iyang gitudlo sa mga ahensiya ug opisina sa iyang administrasyon.

Niapil didto ang akong igsuon nga si Willy Roldan nga maoy executive director sa Fertilizers and Pesticides Authority nga ubos sa Department of Agriculture.

Karong semanaha may pipila sab ka salosalo nga tambongan sa pangulo didto sa kaulohan agi'g pa-goodbye sa iyang natampo sa nasud. Ingon pa sa mga kawani sa Malacanang nga dugay nang nanghipos ang pangulo sa iyang mga gamit aron mobalik sa Davao.

Sa nilabay'ng bulan gibalita nga nagsakay siya sa iyang "big-bike" padulong sa Digos City, Davao del Sur ug nakig-uban sa pagkaon ni Gov. Mark Cagas, nga nihulip sa iyang amahang si Gov. Dodo Cagas sa iyang panimalay. Dugay nang panahon nga wa makasuroy si PRody gamit ang iyang motorsiklo busa naghinamhinam na kining makabalik dinhi aron makauban ang "Every Sunday Bikers Club" ug ubang grupo nga iyang giapilan.

Siyempre gihandom sab sa pangulo nga makauban niya ang iyang mga mahal sa kinabuhi, mga kapamilya ug higala nga nahikling tungod sa daghang trabaho sa Malacanang. Gikapoy na tingali siya maminaw og isyu sa politika busa mas gusto pa niyang mag-istorya sa ilang kaagi sa gagmay pa sila, sa iyang pasaway nga pagka-ulitawo, kalihukan sa iyang mga anak ug apo, mga isyu sa marites ug maridol nga nagpalibot kaniya ug simpleng pagkaon nga giandam sa panga-on.

Mas makapahulay ug makatulog na siya og lawom matag gabii ug wala na sa iyang abaga ang problema sa Covid-19, utang sa Pilipinas, away sa Senado ug Kongreso, isyu sa West Philippine Sea, giyera sa Ukraine, mga isyu sa Asean, mga kurap ug pasaway sa gobyerno, pagtaas sa presyo sa lana, insurhensiya, problema sa tubig ug elektrisidad, kahuot sa trapiko ug daghan pang uban. Karon ang iyang hunahunaon mao ang iyang matampo sa BBM-Sara administration isip yanong lungsuranon, asa siya mosuroy ugma, kinsang paryente iyang bisitahon ug unsay kan-on niya sa paniudto ug panihapon.

Layo kaayo kini sa dihang presidente pa siya sa nasud o kadtong bisan mayor pa siya sa Davao. Hapsay ug gialirongan siya karon sa iyang mga mahal sa kinibuhi dili parehas kaniadto nga gialirungan siya'g mga politiko nga buot magpatabang o magpasipsip sa iya.

Sa akong tan-aw, ang dakong preparahan na lang ni PRody mao ang iyang kaso sa International Criminal Court (ICC) tungod sa isyu sa "extrajudicial killings" sa panahong mayor pa siya sa Davao ug sa iyang unang tulo ka tuig pagka-presidente.

Gibalita nga nisugod na usab og lihok ang prosecutor sa ICC nga ipadayon ang imbestigasyon sa gitawag niini nga "crime against humanity" batok kaniya. Kahibalo ako nga bug-at kining kaso nga iyang atubangon apan duda ko nga dili kini matigayon sa sunod unom ka tuig. Salamat PRRD!