HELLO everyone! Hapit na gayud ang Disyembre bah, nag-andam na mo’g regalo alang sa inyong pamilya, kinugos ug mga higala? Ako, naa gamay kay wala may ikapalit og daghan. Ha ha ha!

Bitaw, maka-excited ning Pasko kay daghan kaayong manggihatagong mga tawo. Makakulba pud gamay kay bisan wala nangayo atong mga kinugos ug kaparyentehan, makaulaw man kung wala kitay pahalipay bisan gamay. Maka-pressure!

Sa bag-ohay pa lamang nga pakigbugno sa atong Pinoy pride boxer, Nonito Donaire, napildi siya sa iyang kaniadtong estudyante nga Hapon nga si Naoya Inoue.

Bisan pildi sa dula, daog gihapon si Donaire sa kwarta kay syempre gigarantiya na iyang sweldo gikan sa iyang kampo, sponsors ug uban pa nga nagpasiugda sa dula.

Sa iyang kalibre, milyon ang iniphanay, pare. Wa gayuy lugi kay mawala ra man ang mga bun-og sa kalawasan.

Ana gayud ng kompetisyon bisan magtabla panagsa, naa gayud modaug ug mapildi sa katapusan, higala. Wala nakabsan ang akong saludo kang Donaire sa ring.

Bisan pa kang People's Champ Manny Pacquiao, saludo ko pildi o daog man sa iyang laban. Nakigbisog si Pacquiao gamit iyang kahanas, talento ug pangutok nga nagdalag dakong garbo sa Pilipinas.

Natuk-an lang kog gamay sa pulong ni Donaire nga luyo sa iyang pagkapildi, nagpaubos gayud siya sa winner nga si Inoue kay gihulam niya ang ganti nga tropeyo ni Mohammad Ali. Iya man gud kunong gisaad sa iyang mga anak nga mouli siya nga bitbit ang maong tropeyo.

Ang maong aksyon ni Donaire, dili kuno alang niya apan sa iyang “word” o “pulong” kay lagi mao ni iyang saad sa iyang anak. Akong pangutana, mabulag ba diay nimo imong kaugalingon sa imong pulong?

Dili ba kung unsa ang mogawas sa imong baba nga gikan pod sa imong kasingkasing nagpaila sa imong tinuod nga pagkatawo?

Siguro, nindot kaayog intensyon si Donaire nga tudloan iyang mga anak sa leksyon nga dawaton sa pagpaubos ug grasyosong pamaagi ang pagkapilidi.

Apan, mangutana na sab ko: “Nganong mosaad man ka sa butang nga posibleng dili maimo?” Dili ba kini maskara sa garbo?

Mas nindot kaha nga wala na lang niya gihulam sa usa ka gabii ang tropeyo aron mapasabot niya og tarung sa mga bata nga sa kinabuhi walay “100 percent sure.”

Nganong ningsaad siya nga mauli niya ang tropeyo nga napildi man siya sa torneyo?

Ang uban “palabra de honor” kuno ni, nga imo gayud tumanon imong gisaad.

Nindot na, apan mas maayo man kanang dili na lang mosaad kontra sa mosaad unya mopalpak diay.

Unsang leksyon ang matun-an sa mga bata ni Donaire karon? Bisan pildi huramon gayud ang trophy kay gisaad nimo kini? Murag dili ko agree. Kung pildi, better luck next time. He he he!