USA ka 67 anyos nga dalaga gidali sa pagdala sa Digos Doctors Hospital human gipusil sa agtang sa iyang igsuong lalaki.

Nilutaw sa inisyal nga imbestigasyon sa kapulisan nga ang biktimang si Elizabeth Velasco, lumolupyo sa dalang Dahlia sa lungsod sa Bansalan, Davao del Sur, gipusil sa manghod niya nga lalaki sa wala pa masayring hinungdan.

Ang suspek nailhang si Eliezer, 66, minyo ug molupyo sab sa maong dapit.

Gisulti ni PO2 Joy Lynn Abagon, imbestigador sa krimen, nga mga alas 6:45 ang takna kagahapon sa buntag sa dihang nahitabo ang krimen.

Daling gisapupo ang biktima sa mga kabanay ug gidala sa tambalanan.

Mga otoridad nga niresponde sa alarma nagsulti nga nigamit ang suspek og paltik nga airgun aron pusilon sa makausa ka higayon ang maguwang niyang babaye.

Hinuon, nadakpan sa kapulisan ang suspek kinsa nagtingkagol na sa selda sa Bansalan police samtang gihan-ay dayon ang pagduso og kaso batok kaniya. (Dondon Dinoy)