PULOS nilanding sa balay tambalanan ang duha ka mga biktima sa pagpanigbas nga natigayon sa managlahing dapit.

Unang biktima si Ismael Darion, 24, ulitawo, taga Upper Balulang ning siyudad sa Cagayan de Oro.

Gitumbok nga suspetsado ang silingan niining nailhan sa pangalan nga Joseph, anaa sa 30 anyos pataas ang pangidaron.

Si Homer, amahan sa biktima nibutyag sa Sun.Star Superbalita nga nahitabo ang pagpanigbas niadtong Domingo, mga alas 11:00 sa gabii dihang nagbikil sa estorya ang duha.

Unang nananghid si Joseph nga mouli na sa puloy-anan hinungdan nga nagtuo ang biktima nga wala lang niini ang nahitabong bikil.

Pauli na si Darion sa puloy-anan gikan sa giinoman niini dihang gitabo ni Joseph ug gitigbas.

Naigo ang ulo ug likod nga bahin sa biktima, human dali nga misibat ang suspetsado.

Dali nga gidala sa Northern Mindanao Medical Center ang biktima kinsa anaa sa kritikal nga kondisyon ning panahona. Ang kaso giatiman na sa kapolisan sa Police Station 4 sa Carmen.

Samtang usa ka amahan nga si Felix Pagalan, 53, lumad nga taga lungsod sa Libona, Bukidnon ang nilanding sa susamang tambalanan human gitigbas gamit ang atsa.

Nasayran gikan sa anak niini nga ni-aparta lamang ang biktima sa nahitabong panag-away sa iyang mga silingan niadtong Domingo mga alas 7:30 sa gabii apan kalit lang ang gihimong pagpanigbas ngadto kaniya.

Nagisi ang agtang sa biktima apan luwas na sa makuyawng kahimtang ning panahona. (SVB)