USA ka lalaki ang gisikop sa mga otoridad gumikan sa paghupot og granada didto sa Barangay Lapaz, lungsod sa Carmen, Davao del Norte, Martes sa gabii.

Nailhan ang dinakpan nga mao si Joel Demaisid, 38, ug molupyo sa Teacher's Village, Barangay Sto Niño, dakbayan sa Panabo.

Sa report gikan sa Carmen Municipal Police Station nasayran nga alas 10:15 sa gabii nasikop ni Senior Police Officer 1 Lupiba ug mga kaubang pulis ang suspek didto sa nahisgutang barangay.

Usa ka tawag ang nadawat sa mga otoridad gikan sa kapitan sa Barangay Lapaz nga nagsumbong mahitungod sa usa ka lalaking hubog nga naghupot og granada sa dapit.

Gilayong miresponde ang mga otoridad ug ilang nasikop ang suspetsado.

Nasakmit gikan sa posisyon sa dinakpan ang usa ka granada nga iyang gigunitan.

Sigun sa mga personahe gikan sa Explosive and Ordnance Team EOT-Davao del Norte nga ang maong granada usa ka MK2 fragmentation hand granade.

Dakung kadaut matud pa ang mahimo unta sa granada kun nakabuto pa kini.

Ang suspek gitanggong dayon sulod sa selda sa pulis sa Carmen.

Kasong illegal possesion of explosive ug paglapas sa gun ban ang giandam sa kapulisan batok sa suspetsado.(Marvin Pineda)