DAVAO CITY - Diriyot maugdaw ang usa ka balay human gidabdaban sa 17-anyos nga babaye alas 6:30 sa gabii niadtong Biyernes didto sa Kilometro 9, Purok 6, Barangay Tigatto, Buhangin District, siyudad sa Davao.

Ang balay gipanag-iyahan ni Sandy Magno Abellana, hamtong ang pangedaron samtang ang suspek giila nga si Ellaine (bansagon gitago sanglit menor de edad), 17.

Sa gihimong imbestigasyon ni Police Officer 3 (PO3) Ruben Corsino sa Buhangin Police Station, nasayran nga intensiyon ni Ellaine nga dabdaban ang balay ni Abellana human nga nakita mismo sa tag-iya nga mikuha siya og lighter ug gisindihan ang kurtina sa kuwarto ni Joshua Ian Torres, bayaw sa biktima.

Daling miulbo ang kalayo sa kuwarto ni Torres diin naugdaw ang mga gamit niini.

Giingong dunay bikil si Abellana ug ang suspek hinungdan nga nahimo sa ulahi pagsunog sa balay kon diin mokabat sa P10-mil ang danyos.

Hinuon nadakpan sa kapulisan ang suspek nga mitago matud pa sa ilang silingan.

Sa pagkakaron, ang suspek anaa na sa Women and Childrens' Protection Desk sa Buhangin Police Station. (Jeepy Compio)