DUNA pa bay igong rason nga pabantayon sa mga sakyanan sa kalsada ang mga sakop sa Highway Patrol?

Hinuon, tulo man lamang ka pulis nga sakop sa Highway Patrol ang nasakpan sa mga pulis tungod sa katahap nga nangilkil atol sa entrapment operation didto sa Guihing, Hagonoy, Davao del Sur niadtong miaging adlaw.

Ang gibuhat sa tulo wa nagpasabot nga mao usab kadto ang binuhatan sa ubang miyembro sa maong buhatan sa pulis.

Apan ang pagbutang og pulis sa kadalanan aron pagsita niadtong mga nakalapas sa reglamento sa trapik angay nga tun-an.

Dili man lang kay karon lang kita nakadungog sa mga kotong cops nga gireklamo kay nanastas gikan sa mga motorista.

Dunay uban nga nabiktima sa pagpangilkil sa mga otoridad sa kadalanan nagpakahilom na lamang kay nangahadlok ug wa nay gusto og samok.

Pipila ka mga fishcar, mga sakyanan nga tighakut og utanon, kahoy ug uban pa nahiagum sa way kasingkasing nga mga otoridad sa kalsada.

Tingali labing maayo nga pili-on lamang kadtong mga pulis nga ipakatap sa kalsada ug dili kaha mas maayo nga mag-hulma og pamaagi ang mga kadagkoan nga dili na makapanapi kining mga otoridad nga wa pa matagbaw sa ilang suhol.

Sa samang higayon usab, mas maayo nga kadtong mga pulis nga napamatud-an nga sad-an silhigon na gikan sa serbisyo aron di sila makatakod sa mga buotang pulis, ilabi na kadtong bag-o lamang sa serbisyo.