MATAG palpak sa bana-bana sa panahon, makatilaw intawon og kastigo sa mga saway ang Philippine Atmospheric, Geographical, Astronomical Service Administration (Pagasa).

Sama sa nahitabo kagahapon nga ilang gitagna nga maayo ang dagan sa panahon kay di mag-uwan.

Init kuno nga panahon ang mapaabot sa mga Sugboanon ug mga bisita nga mamista Senyor.

Apan nianang hapit nang udto, nagsugod na pagbundak ang uwan hangtod na sa hapon.

Lahi ni sa gibana-bana sa mga weather forecaster sa Pagasa pipila ka mga adlaw ang nakalabay.

Kadtong wa makadala og payong, napugos sa pagpamasilong intawon aron di mabasa sa uwan kay nabuwad ra ba sab sila sa init.

Apan di baya mabasol sa kinatibuk-an ang Pagasa kay ang weather forecasting kun pagbana-bana sa panahon usa sa mga labing lisod kaayong siyensya.

Labina gyud ang Pilipinas nga usa sa mga nasod nga ang panahon unstable kaayo kun mag-usab-usab.

Pipila ka mga tuig na ang nakalabay gani, ang National Aeronautics and Space Administration (Nasa) sa Estados Unidos, naghimo og weather mapping dinhi sa nasod.

Naglisod sila. Matod sa ilang mga sakop nga mianhi, ang usa ka adlaw nilang trabaho didto sa US nilanat og duha ka mga semana dinhi sa nasod.

Kay matod nila kanunay mag-usab-usab ang panahon.

Mas tukma tingali nga weather forecasting ang atoang madawat kon tinud-on gyud ang pag-moderno sa mga galamiton sa Pagasa.