TALANDUGON ang kahimtang sa usa ka shellcraft worker human giingong gikulata ug giduslak-duslak og icepick sa iyang agawon human gipasanginlan nga mimolestiya sa anak nga menor de edad sa suspek.

Apan ang mga kabanay ni Marlon Degamo, 26, taga Jetafe, Bohol, mialigar nga gitumo-tumo-an lang ang biktima human nireklamo ngadto sa suspek nga giilang si Dandan Nadera, 49, kabahin sa iyang suholan.

Kini nahitabo sulod sa gamay nga payag sa Sityo Alaska, Barangay Mambaling, dakbayan sa Sugbo.

Sa pasiuna nga imbestigasyon nila ni SPO4 Alex Dacua, PO3 Leroy Baguio ug PO2 Domino Decorina nga nakatulog na ang biktima dihang sa kalit lang nisulod ang suspek uban sa laing upat ka mga tawo.

Giingong gitabangan pagbunlot ang biktima.

Ang biktima gikulata ug pagka human giduslakduslak gamit ang icepick nga niresulta sa daghang mga samad sa biktima.

Human sa pagdunggab, gibiyaan ang biktima nga nagbuy-od sa sawog.

Dugang nasayran sa kapulisan nga gipasanginlan ang biktima nga nipahimulos sa anak sa suspek nga usa ka menor de edad.