USA ka lalaki nasikop sa checkpoint sa Joint Security Control Center (JSCC) ug Commission on Election (Comelec) dinhi sa probinsya sa Davao del Sur, Martes.

Ang dinakpan nga si Conrado Dante, 43, minyo, mag-uuma ug molupyo sa Sitio Cadinas, Barangay New Clarin, sakop sa lungsod sa Bansalan, maoy ikaduhang dinakpan sa paglapas sa Comelec Resolution 8714 ug Omnibus Election Code, alas 5:45 ang takna sa hapon niadtong higayona.

Si Inspector Reniel Raotraot, deputy chief of police sa lugar, maoy nangulo sa gimuntar nga JSCC/Comelec checkpoint didto sa Sitio Curvada, Barangay Poblacion Uno sa dapit, ug naatlan nga niagi ang maong tawo.

Subay sa gipagulang taho sa kapulisan, nagbaton ang suspek og armas de bomba nga may serial number 16599 ug aduna kini karga nga 50 ka mga bala.

Gikustudiya dayon sa kapulisan ang dinakpan samtang gihan-ay ang pagpasaka kaniya og asunto.

Sa tala sa kapulisan, duha pa lang sa probinsiya ang nasikop human nagsugod ang hugot nga kampanya sa Comelec sa election gun ban.

Nagbahad ang kapulisan nga way ni bisan kinsang armado nga palutson sa matag checkpoint diha sa kadalanan hangtod nga matapos ang maong balaodnon sa Hunyo 30 ning tuig.

Gipaningkamutan sa Comelec, kapulisan ug militar nga molampos ang ilang kampanya sa pagpatuman sa hapsay ug malinawong piliay sa lalawigan.(Orlando B. Dinoy)