HUGTANONG gipanghimakak ni Maguindanao Assemblyman Khadaffy Mangudadatu ang balita nga iyang likayan ang checkpoint sa Comelec didto sa Davao del Sur.

Giklaro sab niya ang pasangil nga may mga escort siya nga nagdala og armas nga way igong papeles.

Sa pakighinabi sa Bombo Radyo, giusa-usa og tubag ni Mangudadatu ang mga akusasyon kaniya.

Sumala pa nga walay nahitabong ginukdanay tali kaniya ug sa kapulisan sa Davao del Sur tungod mihunong dayon sila sa checkpoint nga gimuntar sa Barangay Cogon, Digos City.

Gawas niini, gitin-aw sab ni Mangudadatu nga kompleto ang papeles sa iyang mga security escort apil na ang ilang gihuptan nga armas.

Gipasalig ni Assemblyman Mangudadatu nga bisan og nagbaton siya og pipila ka mga escorts dili gayud mahitabo nga abusuhon nila ang ilang gahum.

Gipasabot sab niya nga tungod sa grabeng hulga sa ilang pamilya tungod sa away politika, nakadesisyon sila nga magbaton og ubay-ubay nga security escorts.

Gani, mihangyo pa si Buluan Vice Mayor Esmael Toto Mangudadatu kang Department of Interior and Local Government Secretary Ronaldo Puno ug sa Comelec nga dungagan ang ilang mga bantay nga pulis.

Gumikan hangtud karon grabeng hulga ang ilang nadawat pinaagi sa text ug tawag sa cellphone. (Edgardo Fuerzas)