MAYORIYA sa mga pamilya nga nangaapektuhan sa sunog sa Barangay Subangdaku, Mandaue city nagdumili sa pagpasilong sa temporary relocation site alang sa mga nasunogan.
Usa ka gymnasium sa usa ka barangay ug tunghaan ang temporaryo unta nga relocation site sa mga biktima, apan wa kini nila dawata.
Sila mas komportable nga magtukod og barong-barong o temporaryong kapasilongan sa dapit nga nasunogan sa Sityo Aroma.
Ang dapit, sa ikaduhang higayon, naigo sa sunog niadtong Lunes sa hapon diin gatusan ka mga balay ang nangaugdaw.
Si Barangay Kapitan Walter Dy nagkanayon nga nagbutang sila karon og daghang mga tulda sa dapit aron maoy kapasilongan sa mga tawo.
Nabalaka ang mga pamilya nga apiktado sa sunog nga di na unya sila makabalik sa ilang pwesto nga giukopahan.
Gibutyag usab ni Dy nga sa milabay nga sunog diriyot wa makabalik ang mga apiktado sa sunog human mitumaw ang negosasyon nga bawion og balik sa pamilyang Tanchan ang usa ka ektaryang luna nga gipuy-an sa mga apiktado sa sunog.
Apan wa kini madayon kay wa makahatag sa gidemanda ang pamilyang Tanchan human mangayo og tabang pinansyal ang apiktado nga mga pamilya tungod sa giingong kakulian sa panalapi.
Gibutyag usab ni Dy nga ang luna nga nasunogan gilibutan sa mga luna nga gipanag-iya sa Aboitiz.
Nisuway sa paghikling ang mga nasunogan sa luna nga gipanag-iya sa Aboitiz, apan napakgang tungod sa pagbadlong sa mga security guard nga nagbantay sa maong luna. (JFT)