Regino T. Flores
Bugnay II, Labangon, Cebu City
rNing adlaw sa mga Santos
Ania ako niining sam-ang
Hinangad ang agtang nangaliya
Sa mga kalag sa mga tawong patay na
Kon hain man karon sila ibutang sa Ginuo.
Sa langit ba, sa impiyerno o purgaturyo?
Ning wanang sa mga lubong
Kining diwa gisikdo’s pamalandong.
Kahiladman mituaw sa hilom,
Mas maayo pa sila nakapahulay na.
Apan ako ania nagpabiling nagtikawtikaw
Ning kalibutan.
Bugno sa panginabuhi: siging kaskas karida,
Kaskas diri, kaskas didto.
Sayaw sa kawad-on!
Ug kining dinagkutan kong kandila
Anhi ko na lang i-ugbok sa Dakong Krus
Kay bisan giunsa ko pagpasarap
Kining panan-aw sa dakong wanang
Sa kalubngan, wa na gyud nako makit-i
Ang lubong sa akong mga igsuon
Nga dugay na diayng gipapas sa panahon!