NATUMBOK na sa otoridad ang mga suspek nga mipusil sa usa ka principal sa alas 5:40 sa buntag niadtong Miyerkules didto sa probinsiya sa Maguindanao.

Nailhan sa kapulisan ang biktima nga si Anthony Ambil, 49, minyo, principal sa Datu Piang Elementary School.

Sigun sa taho gikan sa Maguindanao Police Provincial Office nga samtang pagawas ang biktima sa iyang pinuy-anan sa Barangay Buayang, Datu Piang, kalit lang giduolan og duha ka wala mailhing tawo ug gipusil ang biktima gamit ang kalibre .45 nga pistola.

Dali sab nga misibat ang mga suspetsado sakay sa usa ka XRM nga motorsiklo paingon sa wala matino nga dapit sa diha nga ilang nakit-an nga naligo na sa iyang kaugalingong dugo ang biktima.

Gisapupo gilayon ang biktima sa iyang pamilya ug gidala sa Maguindanao Provincial Hospital, diin anaa siya sa kritikal nga kahimtang sa diha nga nakaangkon og lima ka samad pinusilan sa nagkadaiyang parte sa iyang lawas.

Si Maguindanao Police Provincial Director Marcelo Pintac nagsulti nga politika ang motibo sa hitabo gumikan niadtong milabay nga barangay ug Sangguniang Kabataan eleksiyon dunay nakalalis ang biktima nga usa ka kandidato.

Ang biktima mao ang kanhing tsirman sa Board of Election Tellers (BET) sa Datu Piang Elementary School.

Padayon pa ang gihimong imbestigasyon sa kapulisan sa maong hitabo. (Edgardo Fuerzas)