DAVAO CITY - Usa ka pulis ang gibalhog sa San Pedro Police Station human giingong nangulata'g asawa, alas 3:00 sa kaadlawon, Biyernes.

Sa impormasyon nga nakalap sa Superbalita sa mga inmates sa presinto dos, giingong gireklamo ang pulis gumikan nangulata sa iyang asawa.

Dihang gihinabi ning tigsuwat ang pulis, nagdumili siya nga mohatag og pamahayag ug mihangyo nga di siya panganlan sa istorya.

Ang Women and Childrens' Protection Desk (WCPD) sa San Pedro PNP ilaha sab nga gitago ang impormasyon ug wa gisulti kung asa nga police station sa dakbayan nadestino ang pulis atol pakighinabi sa Superbalita kagahapon sa buntag.

Sa logbook sa jailer sa presinto, dunay nakapatik didto nga pangalan niini nga dunay kalapasan sa Republic Act 9262.

Sumala pa nga ang pulis nagkulata sa iyang asawa sa dihang miuli sa ilang balay nga hubog.

Hinuon, giingong mopasaka og kaso ang asawa batok sa bana nga pulis sa kalapasan sa Republic Act 9262 kun Violations Againts Women and their Children (VAWC) ngadto sa korte.